khadanovich (khadanovich) wrote,
khadanovich
khadanovich

Шарль Бадлер. "Авэль і Каін"



I

Род Авэля, гуляць і жэрці
Дазволіў Божанька табе.

Род Каіна, табе да сьмерці
Жыць у галечы і журбе.

Род Авэля, твае ахвяры –
Ля ног Нябеснага Айца.

Род Каіна, трываеш кары
І катаваньні без канца.

Род Авэля, чародаў лішкі
І хлеба ўдосталь дорыць лёс.

Род Каіна, бунтуюць кішкі
І выеш з голаду, як пёс.

Род Авэля, у хатнім коле
Цябе сагрэе твой агмень.

Род Каіна, у голым полі
Дрыжы ад сьцюжы ноч і дзень.

Род Авэля, пладзіся й множся –
І дзеткам Бог пашле ўмалот.

Род Каіна, дзьве дзюркі ў носе –
Увесь прыбытак і прыплод.

Род Авэля, даюць – то сёрбай,
Расьці клапом, бо так прасьцей.

Род Каіна, з жабрачай торбай
Хадзі – і навучы дзяцей.


II

Род Авэля, твая падліна
Угноіць глебу! Зьнікні, здань!

Род Каіна, твая хвіліна
Настала, дык з калень устань!

Род Авэля, ідзе расплата,
Рыхтуе косы і пятлю!

Род Каіна, ня бойся ката
І скінь зь нябёсаў на зямлю!

Арыгінал: http://fleursdumal.org/poem/190
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments